Hevur tú ein innara sniðgevara?

Í Føroyum hava vit nógv fólk, sum duga ótrúliga væl at binda "upp á giss", skapa síni egnu snið, og sum eru so ótrúliga kreativ.

Hvussu skrivar man eina uppskrift?

Fyrst og fremst, so skalt tú hava okkurt at skriva niður á - og við.
Skriva alt niður, sum tú gert. Hvussu nógv eygu kastar tú uppá? Hvussu langur bleiv bulurin áðrenn nøkur broyting var? Skriva niður og ver sera nágreinilig.

Tá ið plaggið er liðugt skalt tú taka myndir.

Tak myndirnar um dagin, í góðum ljósi. Ikki á middegi, tí tá stendur sólin beint omanfyri okkum, so skuggarnir vera so tungir.
Um tú hevur bundið eitt klædnaplagg, fá so onkran at fara í tað heldur enn at leggja tað flatt.
Tak mynd av persóninum frammanífrá og aftanífrá, so at tey, sum skulu keypa uppskriftina, kunnu síggja hvussu plaggið sær út.

Ok, liðug. Hvat so?

Tá ið tú ert liðug, skalt tú seta alt saman til eina uppskrift. Fyri at gera tað lættari fyri teg, hava vit gjørt eina ókeypis skapilón, sum tú lætt kanst útfylla (her er leinkið til skapilónina). Í skapilónini sært tú eisini hvat er týdningarmikið at minnast til at skriva niður, tá ið tú bindir - sum t.d. hvat tógv tú brúkar, o.s.fr.

Nú er uppskriftin klár at verða útgivin, men um tú vilt hava uppskriftina uppaftur betri, so viðmæla vit at tillaga uppskriftina til minst tríggjar støddir (jú fleiri, tess betri), fáa plaggið royndarbundið og møguliga rættlisið og reinskrivað. Hesum kunnu vit hjálpa tær við. Set teg í samband við okkum, so kunnu vit ráðgeva tær og geva tær eitt tilboð.

Tá ið uppskriftin skal útgevast

Um tú vilt sleppa at selja tína uppskrift á nethandlinum hjá okkum, so skalt tú bara skriva okkum ein teldupost:

  1. Viðfest uppskriftina. Uppskriftin skal vera í .pdf formati.
  2. Viðfest myndir, helst meira enn eina. Myndirnar skulu helst vera í .jpg ella .jpeg formati. Myndirnar verða brúktar til vøruna á heimasíðuni og til sølufremjandi tilfar.
  3. Viðfest avtaluskjalið. Um tú ikki hevur fingið eitt, spyr okkum so um eitt avtaluskjal. Hetta skalt tú prenta og útfylla, og tá ið tú sendur okkum tað aftur, skalt tú senda avrit/mynd av ØLLUM síðunum - tvs. ikki bara teimum, sum tú hevur skrivað á.
    Um tú hevur fleiri uppskriftir at senda okkum, so kanst tú gott skriva fleiri á sama avtaluskjal.
  4. Skriva gjarna ein setning, sum greiðir frá plagginum í einum stuttum samandrátti.
  5. Um tú vilt, skriva so eisini hvat # tú ynskir, at plaggið skal hava (t.d. #HeimÍHeiðarnarTurriklæði). Ger gjarna títt # greitt, fyri at tryggja tær at einki annað eitur tað sama, ella fer at eita tað sama í framtíðini.
  6. Send teldupostin til uppskrift@uppskrift.fo

Vit miða eftir at leggja uppskriftina út skjótast gjørligt og innan 5 arbeiðsdagar, men gev gætur, at tað kann vera at vit skumpa tað longur fram, t.d. fyri at fleiri uppskriftir ikki skulu koma út sama dag. Um tað hevur skund at fáa uppskriftina út, lat okkum so endiliga vita tað, so eingin misskiljing er.

Vit vilja hjálpa tær

Vit vilja gera tað lættari fyri øll at skriva uppskriftir. Í Føroyum hava vit nógv fólk, sum duga ótrúliga væl at binda "upp á giss", skapa síni egnu snið, og sum eru so ótrúliga kreativ, men tað kann vera torført at skriva niður, rokna um til fleiri støddir, fáa royndarbindarar o.s.fr.
Vit hava gjørt mannagongdina eitt sindur lættari, við at vit hava ment eina ókeypis uppskrift-skapilón, samlað eitt toymi av royndarbindarum, bjóða ráðgeving, rættlesnað og rætting av uppskriftum og við at vit fegnar vilja selja uppskriftina hjá tær fyri teg her á Uppskrift.fo

Set teg í samband við okkum

Vit tríggjar